Serikali ya Mapinduzi Zanzibar imeishukuru Taasisi ya Jakaya Mrisho Kikwete (JMKF) kwa jitihada zake kubwa za kuwawezesha walimu kupata ujuzi na maarifa ya kuingiza teknolojia ya kisasa katika ufundishaji wao, pamoja na kuboresha mbinu za ufundishaji na ujifunzaji.
Naibu Waziri wa Elimu na Mafunzo ya Amali, Mheshimiwa Ali Abdulgulam Hussein, alitoa pongezi hizi wakati wa kufunga mafunzo ya miezi minne kuhusu mbinu za ufundishaji wa karne ya 21 kwa kompyuta na mtandao kwa walimu wa shule za sekondari, yaliyofanyika katika Ukumbi wa Mikutano wa Shule ya Sekondari Tumekuja, Unguja.
Mhe. Hussein alisisitiza kuwa Serikali ya Awamu ya Nane chini ya Dkt. Hussein Ali Mwinyi inatoa kipaumbele katika kuunda mazingira rafiki ya kujifunzia na kuwaandaa walimu kukabiliana na maendeleo ya kiteknolojia.
Naibu Waziri aliishukuru JMKF kwa kufadhili mafunzo hayo na Taasisi ya Teach United kwa kuandaa vipindi vya mafunzo kwa kushirikiana na wataalamu na rasilimali mbalimbali.4
Alibainisha kuwa juhudi kama hizi ni muhimu kwa Zanzibar kuhama kutoka mbinu za ufundishaji wa mazoea kwenda mbinu za ufundishaji wa kisasa zinazoendana na mabadiliko na mageuzi ya elimu yanayoendelea duniani .
Aidha, Naibu Waziri aliisihi taasisi hiyo kupeleka mafunzo kama hayo kisiwani Pemba, akisisitiza umuhimu wa mafunzo kwa walimu wote, waliopo kazini na wale wanaojitolea.
"Mafunzo haya ni muhimu siyo tu kwa kuboresha ubora wa ufundishaji, bali pia kwa kufuatilia maendeleo ya wanafunzi. Kupunguza upungufu wa walimu na kupunguza mzigo wa vipindi vingi vya kufundisha, kutasaidia sana kuboresha matokeo ya ufundishaji na ufaulu wa wanafunzi," aliongeza.
Mkaguzi Mkuu wa Elimu, Bi. Maimuna Fadhil Abbas, aliwahimiza washiriki wa mafunzo hayo kuwa mawakala wa mabadiliko kwa kushirikisha wenzao maarifa mapya waliyopata. Pia alieleza mipango ya kufuatilia jinsi walimu wanavyotekeleza ujuzi walioupata katika shule zao.
Dr. Catherine Sanga, Kaimu Mkurugenzi Mtendaji wa JMKF, alisisitiza dhamira ya taasisi hiyo kusaidia juhudi za serikali kuboresha sekta ya elimu na nyinginezo.
Alisema Taasisi ya JMKF, iliyoanzishwa mwaka 2017 na Rais wa Awamu ya Nne, Dkt. Jakaya Mrisho Kikwete, inalenga maeneo matatu muhimu: afya ya mama na mtoto, maendeleo ya vijana na elimu, na kuinua biashara ndogo ndogo za wakulima.
Dr. Sanga alieleza kuwa juhudi za elimu za JMKF zinalenga kusaidia serikali katika kushughulikia changamoto ya upungufu wa walimu na kuwawezesha walimu kuwa na mbinu bora za kufundisha na vifaa vya kufuatilia maendeleo ya wanafunzi.
Mkurugenzi wa TeachUNITED Afrika, Bi. Angela Kithao, alithibitisha nia yao ya kuboresha sekta ya elimu nchini Tanzania kwa kuachana na mbinu za kitamaduni za ufundishaji na kuelekea mbinu za ubunifu zinazolingana na viwango vya kimataifa
Bi. Kithao alisisitiza kuwa mafunzo kama haya yanahakikisha kuwa wanafunzi wanapata elimu bora kutoka kwa walimu wenye ujuzi na motisha.
Mafunzo hayo yalihitimishwa kwa walimu 60 kutoka Unguja kupokea vyeti, wakiahidi kutumia maarifa waliyopata kuboresha matokeo ya wanafunzi na kuwashirikisha wenzao, ili kuchochea mabadiliko makubwa katika sekta ya elimu Zanzibar.
Naibu Waziri wa Elimu na Mafunzo ya Amali,
Mheshimiwa Ali Abdulgulam Hussein, akiwa na Dr. Catherine Sanga, Kaimu
Mkurugenzi Mtendaji wa Jakaya Mrisho Kikwete Foundation (wa kwan`za kushoto
walioketi) Mkaguzi Mkuu wa Elimu Zanzibar, Bi. Maimuna Fadhil Abbas (kulia
kwake) na Mkurugenzi wa TeachUNITED Afrika, Bi. Angela Kithao (kulia) wakipata
picha ya Pamoja na sehemu ya walimu waliohitimu mafunzo ya miezi minne ya ujuzi
na maarifa ya kuingiza teknolojia ya kisasa katika ufundishaji wao, pamoja na
kuboresha mbinu za ufundishaji na ujifunzaji katika katika Ukumbi wa Mikutano
wa Shule ya Sekondari Tumekuja, Unguja, jana Alhamisi Novemba 21, 2024
0 Comments