Soko la Hisa la Dar es Salaam (DSE) limeanza mwaka 2026 kwa kasi kubwa baada ya kurekodi ongezeko kubwa la mapato na faida katika robo ya kwanza iliyomalizika Machi mwaka huu.
Taarifa za kifedha zinaonesha kuwa mapato ya jumla yalipanda kwa takriban asilimia 73 na kufikia shilingi bilioni 6.81, kutoka shilingi bilioni 3.93 katika kipindi kama hicho mwaka 2025. Aidha, faida baada ya kodi iliongezeka kwa asilimia 78 na kufikia shilingi bilioni 3.26 ikilinganishwa na shilingi bilioni 1.83 mwaka uliopita.
Ukuaji huo umechochewa zaidi na kuongezeka kwa shughuli za biashara katika soko hilo, ambapo thamani ya mauzo ya hisa ilifikia shilingi bilioni 571 ndani ya robo hiyo pekee—sawa na takriban asilimia 86 ya mauzo yote ya mwaka 2025 yaliyokuwa shilingi bilioni 663. Biashara katika masoko ya hisa na hati fungani pia iliongezeka kwa kiasi kikubwa.
Vilevile, mapato yaliongezeka kutokana na ada za uorodheshaji wa dhamana za Serikali kufuatia kuongezeka kwa utoaji wake mwaka 2026, pamoja na ada za miamala kutoka mifuko miwili ya uwekezaji (ETFs) iliyoorodheshwa sokoni. Vyanzo vingine vya mapato vilijumuisha huduma za mafunzo na ada za Mfumo wa Hifadhi ya Hati (CSD).
Kwa upande wa matumizi, gharama za uendeshaji ziliongezeka hadi kufikia shilingi bilioni 3.34 kutoka shilingi bilioni 2.01 mwaka uliopita. Ongezeko hilo limehusishwa na kuajiriwa kwa watumishi zaidi, nyongeza za mishahara, pamoja na gharama zinazoendana na ongezeko la shughuli za soko, ikiwemo ada za leseni. Pia DSE imeendelea kuwekeza katika maboresho ya mifumo ya kiteknolojia na shughuli za kukuza biashara.
Hata hivyo, licha ya kuongezeka kwa matumizi, ukuaji mkubwa wa mapato umewezesha DSE kuimarisha faida zake na kuendelea kuonesha mwelekeo chanya wa ukuaji katika mwaka 2026.
0 Comments