Halmashauri Kuu ya Chama Cha Mapinduzi (CCM) imemvua uanachama aliyekuwa Makamu wa Rais wa Jamhuri ya Muungano wa Tanzania, Dk. Emmanuel Nchimbi, katika uamuzi uliofikiwa Jumatano, Agosti 26, 2026, siku moja baada ya kutangaza kujiuzulu nafasi hiyo na kustaafu shughuli za kisiasa.
Uamuzi huo umetangazwa usiku wa leo na Katibu Mkuu wa CCM, Dk. Asha-Rose Migiro, wakati akizungumza na waandishi wa habari katika Ofisi Ndogo za CCM, Lumumba jijini Dar es Salaam.
Dk. Migiro amesema Halmashauri Kuu ilipitia taarifa mbalimbali zilizokuwepo pamoja na Katiba ya CCM na kufikia uamuzi wa kumvua uanachama Dk. Nchimbi kwa kile kilichoelezwa kuwa ni ukiukwaji wa maadili.
“Baada ya kupitia taarifa zote zilizokuwepo, Katiba za CCM, kwa kauli moja Halmashauri Kuu imefikia uamuzi kwamba, kutokana na ukiukwaji wa maadili, afukuzwe uanachama na CCM imefikia uamuzi huo. Si mwanachama wa CCM tena,” amesema Dk. Migiro.
NCHIMBI ALIOMBA KUJIUZULU
Uamuzi huo umefanyika siku moja baada ya Dk. Nchimbi kumwandikia Rais Samia Suluhu Hassan barua ya kuomba kujiuzulu nafasi ya Makamu wa Rais, huku akitangaza pia kustaafu shughuli za kisiasa.
Dk. Nchimbi alisema katika barua hiyo kwamba aliamua kuchukua hatua hiyo baada ya kujiridhisha kuwa Rais Samia anatamani mabadiliko katika uongozi.
“Nimejiridhisha pasipo shaka kuwa Mhe. Rais anatamani mabadiliko, hivyo nimeamua kutimiza ahadi yangu,” alisema Dk. Nchimbi.
Alisema pia kuwa Agosti 27, 2025, alimwahidi Rais Samia kwamba angemsaidia yeye na nchi kwa uwezo wake wote na kwa uaminifu, huku akiahidi kuwa siku ambayo Rais angeona anahitaji Makamu mwingine wa Rais, angeachia nafasi hiyo.
Kwa mujibu wa taarifa yake, Dk. Nchimbi aliomba kujiuzulu nafasi hiyo kuanzia Septemba 4, 2026, akirejea Ibara ya 50(2)(c) ikisomwa pamoja na Ibara ya 149(2) ya Katiba ya Jamhuri ya Muungano wa Tanzania.
Katika taarifa yake, Dk. Nchimbi alimshukuru Rais Samia na CCM kwa imani waliompa, pamoja na Watanzania kwa ushirikiano waliompa wakati wa utumishi wake wa umma.
NDEJEMBI APEWA MWANGA WA KUWA MAKAMU WA RAIS
Katika hatua nyingine, Halmashauri Kuu ya CCM imepitisha jina la Mhe. Deogratius Ndejembi, ambaye ni Waziri wa Nishati, kuwa jina la mrithi wa Dk. Nchimbi katika nafasi ya Makamu wa Rais.
Uamuzi huo unakuja wakati Serikali ikijiandaa kufanya mabadiliko katika nafasi hiyo kufuatia kujiuzulu kwa Dk. Nchimbi.
Ndejembi amekuwa akihudumu katika Serikali katika nafasi ya Waziri wa Nishati, na sasa jina lake limepitishwa na chombo hicho cha juu cha CCM kwa ajili ya nafasi ya Makamu wa Rais, hatua inayofuata taratibu za kikatiba.
NCHIMBI NA SAFARI YAKE NDANI YA CCM
Dk. Nchimbi alikuwa kiongozi wa muda mrefu ndani ya CCM, akianza kushika nafasi za uongozi katika chama hicho tangu mwaka 1998 alipochaguliwa kuwa mjumbe wa Halmashauri Kuu ya Taifa (NEC).
Baadaye alichaguliwa kuwa Mwenyekiti wa Umoja wa Vijana wa CCM (UVCCM), nafasi iliyompa pia uwakilishi katika Kamati Kuu na Halmashauri Kuu ya Taifa ya chama hicho.
Januari 15, 2024, Dk. Nchimbi aliteuliwa kuwa Katibu Mkuu wa CCM na Halmashauri Kuu ya Taifa, akichukua nafasi hiyo baada ya Daniel Chongolo kujiuzulu.
Baada ya Uchaguzi Mkuu wa Oktoba 29, 2025, Dk. Nchimbi aliteuliwa kuwa Makamu wa Rais na kuapishwa Novemba 3, 2025.
Kujiuzulu kwake, kufuatiwa na kuvuliwa uanachama wa CCM na kupitishwa kwa jina la Ndejembi, kunaweka sura mpya katika uongozi wa Serikali na CCM, huku hatua zinazofuata zikitarajiwa kukamilisha mchakato wa kumpata Makamu mpya wa Rais wa Jamhuri ya Muungano wa Tanzania.
0 Comments